انتقد أيمن مشالي نجم الزمالك السابق، تصريحات رضا عبدالعال نجم الكرة المصرية وهجومه على عمر مرموش لاعب فرانكفورت الألماني، والمنتخب الوطني.
ووصل عمر مرموش بعد تألقه في آخر مباريات فرانكفورت بالدوري الألماني، أمام بايرن ميونخ وتسجيله لهدفين، للمساهمة التهديفية رقم 15، كثاني أكثر من ساهم بأهداف في الدوريات الخمس الكبرى والدوريات الأوروبية، خلف هاري كين، مهاجم البافاري.
وبعد تألق مرموش الكبير، انتشر مقطع فيديو «قديم» على مدى واسع يظهر انتقاد الإعلامي مهيب عبدالهادي، ورضا عبدالعال، تواجد عمر مرموش في منتخب مصر.
وقال مشالي خلال تصريحات إذاعية في برنامج الإعلامي خالد الغندور المذاع على «أون سبورت إف إم»: «اللي اتقال على عمر مرموش زي للي حصل مع محمد صلاح والناس انتقدته على مستواه مع المنتخب، إنتو مش شايفين اللعيبة في ليفربول عاملة إزاي وبتساعده إزاي، حتى الأرضية».
وأضاف نجم الزمالك السابق: «ياريت والنبي المحللين يتفرجوا على محمد صلاح بس محدش يتكلم خالص، ده واحد كان في سنة من السنين بعد كريستيانو وميسي».
وأكمل: «تاريخ رضا عبدالعال مع الأهلي الجون بتاع شبين اللي جاب بيه الدوري، وهو لعيب كويس بس الطريقة اللي شغال بيها مش بتعجبني طريقة كلامه عن اللعيبه، وفاكر لم يشتم فلان الناس هتقول بيتكلم في الكورة كويس».
وأردف: «يا ريت يا كابتن رضا ملكش دعوة بـ محمد صلاح وعمر مرموش والناس دي خالص، عشان إحنا ملعبناش برا مصر ومنعرفش نلعب برا».
أتم أيمن مشالي تصريحاته قائلًا: «حد يقولي يا ريت رضا عبدالعال لو راح ليفربول هيلعب على مين، أما مرموش ده راجل سجل جونين في بايرن ميونخ».